Amosando publicacións coa etiqueta Pleno. Amosar todas as publicacións
Amosando publicacións coa etiqueta Pleno. Amosar todas as publicacións

venres, 13 de maio de 2016

NON foi a xente de Nebra a que lle deu a maioría ao PP

Desde o Pleno constituínte non acudirá a outro da actual lexislatura, e o único que saquei claro é que saín bastante aburrido e coido que non fun o único, tras escoitar varios "bostezos", no chamado salón nobre.

A pesar de que agora se celebran ás 20:00 h. a asistencia, baixo a miña opinión foi mínima, xa que apenas pasamos da ducia, contando que 5 eran do BNG.

O que menos me agardaba era que a súa portavoz nos citase por 2 veces aos veciños e veciñas de Nebra, primeiro porque segundo ela, grazas ás obras de última hora a cargo do POS, investido no saneamento (toda aldea de Resúa, Puílla, menos 1 casa e 3 na Aguieira) arrincoulles o seu voto á última hora.

Como o voto é segredo, xa me gustaría saber como está tan segura que TODOS os de esa xente foron parar ao PP, ao igual que os de Beneso.
O gráfico non deixa dúbidas de que o PP gañou en tódalas mesas do Concello, incluso na súa parroquia, polo que non entendo que solo cargara as culpas contra Nebra.
Aínda me resoa nos oídos as risas que soltou moita xente, eu incluído cando nos falou das bondades do monte e como ademais dos porcos lle podíamos sacar máis beneficios. Claro que ese día algunha esquecéuselle dicirnos que a comunidade estaba denunciada polos danos causados que estes lle causaron a un veciño ao que se negaron a indemnizalo, que a día de hoxe non cobrou mentres a outros si que os compensaron.

Das excelencias e mina de ouro que podía ser o monte se gañaban tamén o prometeu no mitin que deron no Son.

Ao mellor Luís e o seu equipo entre outras cousas gañaron en Nebra por isto e iso que daquela non se sabía o que sabemos hoxe de todo o que pasou no monte, porque non foi até setembro cando convocou eleccións ante o "toque que lle deu a Xunta" que apunto estivo de quitarnos o monte. Co que a bo seguro "sería unha arma" a usar contra o PP, porque algúns ven mellor a palla en ollo alleo que a viga «aínda que non estea atravesada» no propio.

Volveunos a citar noutro intre que neste momento non lembro, cando se publique a acta se foi recollido, igual escribo algo a maiores.

O que non podo pasar por alto é a queixa que neste caso fixeron tódolos grupos, pola modificación no proxecto dunha pista en Queiruga, aínda que voume deter expresamente no BNG, polo que pasou aquí coa modificación do proxecto do local veciñal, que a pesar de ser obrigatorio levalo de novo a asemblea, o ex-presidente polas presas que tiña "botábanse unhas eleccións enriba", eludiu adxudicando directamente o 2º proxecto, algo que algunha xente da asemblea local do BNG, coñecía e preferiu poñerse da súa banda en detrimento da legalidade.

Por reclamar esa legalidade foi polo que fun expulsado da secretaría da comunidade. Nuns días publicarei varios documentos que me afectan para que se vexa como fun maltratado e ríndose da ignorancia dos comuneiros e comuneiras, aos que mentiron na asemblea do 13 de maio de 2007.

sábado, 13 de xuño de 2015

O novo equipo de goberno de Porto do Son

Pousado do equipo de goberno. De esquerda a dereita: José Manuel Dean Pouso, Juan Jesús Pérez Santos, Antonio Romero Ribeiro, María José Maneiro Quintáns, José Luís Oujo Pouso, Joaquín García García e María Magdalena Pérez Millares.

Toda información aquí.

Pleno constituínte de Porto do Son

O salón de plenos, instalado de forma provisional no Centro de Interpretación do Castro de Baroña, que serviu de toma de posición da nova corporación municipal fíxose pequeno ao quedar fora a maioría dos veciños e veciñas que non querían perderse este momento tan transcendental para Porto do Son.



Aínda que Josefa Hermo, Asunción Torres e Ánxela Franco como cabezas de lista polos seus partidos postuláronse para ser alcaldesas, ao final non houbo sorpresas, xa que grazas aos sete votos do seu grupo, José Luis Oujo Pouso volverá a ser alcalde por outros catro anos máis.


Ante un público totalmente entregado recibiu de mans de Joaquín García García que por idade presidiu o Pleno, o caxato de man gañado tras unha maioría absoluta incuestionable.
O xa alcalde agradeceu aos presentes o apoio recibido o pasado 22 de maio e dixo "este bastón tamén é voso e póñome a vosa disposición e á da oposición para gobernar todos xuntos estes catro anos", rematando con un, "as portas do Concello están abertas para todo o mundo".
Pousado do equipo de goberno co caxato. De esquerda a dereita: José Manuel Dean Pouso, Juan Jesús Pérez Santos, Antonio Romero Ribeiro, María José Maneiro Quintáns, José Luís Oujo Pouso, Joaquín García García e María Magdalena Pérez Millares.

xoves, 5 de marzo de 2015

A teima do BNG de Porto do Son coas "tabernas"


Aínda que o artigo apareza asinado tamén polo PSOE e o GM Non Adscrito, ao estar publicado na web do Bloque, manteño a postura, quen o escribe é o que menos pode opinar do tema.

Se só fose ese o problema non me importa moito porque non pertenzo ao gremio, mais como militei no partido sei ben quen facía a maioría dos escritos do Nordés, e ollando estas coincidencias parece que segue imperando a maneira do impostor que temos de presidente de facer amigos, terxiversando as cousas e a verdade.

Estiven na asemblea que "non se debera repetir o acontecido", da que o impostor grazas á complicidade do secretario, escribiu o que lle ditou punto por punto «cousa que comigo tentou pero non achantei», burlarse de todos os veciños e comuneiros con esa nota, ao igual que fixera na asemblea. A súa postura si que foi propia dunha taberna. O único que fixo a xente ese día foi preguntarlle as dúbidas, e ante a indiferenza e os desplantes do agora presidente ilegal, foi polo que a xente, xa queimada de tanta soberbia, o deixou alí só no local.

Como non estiven no pleno do PAI non podo opinar, só me limitei a ler opinións vertidas pola xente, doída polo tratamento que se lle dou por parte da oposición. Porén, por moito que a xente berrase «segundo a interpretación do seu escrito», seguen sendo veciños do Son e non deberían menosprezar nin dirixirse a ningunha persoa como "energúmenos", que esa si que sería unha palabra que calquera empregaría nunha taberna, pero non algo para expoñer nun documento oficial «e os dous grupos asinantes non deberan deixarse enredar e estar de acordo con esas formas de expresarse, pois saen igual de mal parados».

Resumo da asemblea que cito: Politizando a comunidade... de novo

mércores, 30 de novembro de 2011

Vemos a palla no ollo doutro e non vemos a viga no noso?

Preguntas feita polo BNG no Pleno do 4 de novembro de 2011
Que conste que a miña labor non é defender a ningún político ou goberno, iso foron outros tempos, pero con que moral se pode facer esta pregunta dende a oposición: «Que están a facer ao respecto dos verquidos incontrolados que se están a realizar no lugar de Quintáns-Nebra?», despois de non facer nada dende o goberno.

Algunhas mostras de como estivo a zona durante a etapa do anterior bipartito.

31/03/10: Lavado-de-cara

21/07/10: Agora-calamos

06/08/10: Isto-xa-cheira

29/11/10: Veciños-de-segunda

03/12/10: Negome-ser-complice

domingo, 30 de maio de 2010

Máis de dous anos perdidos

Parece que a fin dos vergoñentos verquidos incontrolados no noso Concello pode te-los seus días contados, xa que o pleno acepta os terreos de Nebra para o punto limpo. Iso si, a la van dous anos e medio perdidos ou tirados, non se sabe ben por culpa de quen, ou si?.
Menos mal que non se puxo unha cláusula de que se non se facía a obra en dous anos ou se pretendese facer outra cousa, a comunidade recuperaría a concesión. Sendo un pouco malo, foi unha oportunidade perdida para "aproveitarnos" un pouco máis do Concello, que xunto con Xuño somos ás parroquias máis desfavorecidas.

Debullando a noticia quédome con dous apuntes:
- Segundo as explicacións do goberno, o motivo de aceptar eses terreos agora foi que Medio Rural «cada quince días pide un documento novo. Agora ocorréuselle que hai que levar este asunto a pleno».
Foi una mágoa que cando gobernaba o bipartito na Xunta non fixesen o mesmo, neste caso, non-lle fixo falla ningún papel para entrarlle a saco no agro de meu pai.
- Paréceme fenomenal que paralicen a obra de Xuño porque se cuestione a titularidade dun camiño. Pero é unha pena que algúns deses excompañeiros que co seu voto agora aproban esa paralización, calasen e consentisen a cacicada que o seu compañeiro cometeu contra meu pai. Esta visto que para eles hai cidadáns de primeira, segunda ou terceira.
Que conste que me corto un pouco porque foron moitos anos coma compañeiros e amigos, que se non ía máis lonxe, pero non vale a pena, cada un é responsable dos seus actos.

Ceñindome exclusivamente á noticia, vou debullar un pouco polo miúdo que pasou nestes dous anos e medio. A primeira noticia que tivemos os comuneiros de que o Concello estaba interesado en construílo Punto Limpo na antiga canteira, curiosamente non foi por mediación dos representantes da Comunidade como seria o correcto, se non mediante o panfleto Nordés, editado polo BNG de Porto do Son. Nel dixéronse cousas que os comuneiros xamais manifestamos, porque era imposible facelo sen antes coñecelas pretensións do Concello.

Días despois almorzabamos con esta noticia: Tomé acusa ao presidente dos comuneiros de Nebra de dilatar a instalación do punto limpo. Parte de razón tiña, se-lle fixo a petición en xaneiro, o normal por parte do presidente era convoca unha asemblea o mais axiña posible para debater, aprobar ou rexeitala cesión. Para iso están as asembleas extraordinarias.

O certo é que seis meses despois engade o punto na asemblea ordinaria, que están máis para debater outros temas, pero en fin: Cuarto punto.- Petición da alcaldía para autorizarmos un PUNTO LIMPO en Cadeiras.

Do que pasou nesa asemblea dei resumida información nun post do blogue adicado á comunidade baixo o titulo: Que vergoña. Asemblea que contou coa presenza dunha comuneira i edil do actual equipo de goberno.

Non se aprobou nada porque o presidente non tivo ningún interese e menosprezando aos comuneiros, volveu a convocarnos outra vez aos quince días, faltando a verdade na convocatoria e facendo comentarios máis propios de taberna.

Por motivos de traballo non puiden asistir a dita asemblea e non houbo ningunha outra, onde se informase da xuntanza mantida varios comuneiros co alcalde. Teño que supoñer que as cláusulas que se pactaron nesa asemblea, foron as que lle presentaron ao alcalde e que este as aceptou. Non é normal o que pasou, pero é que pasan tantas cousas anormais que unha máis non se nota. O certo é novamente gracias á La Voz de Galicia, soubemos que: Comuneiros de Nebra ceden dous mil metros cadrados para que se habilite o punto limpo.

Por certo, ese mesmo día acompañado do Xefe do IV Distrito de Noia foramos ve-la cacicada que lle fixeran a meu pai, e tampouco tiña constancia da cesión. El tamén se informara de todo isto pola prensa.

Zona onde se vai instalar o punto. Aínda que nas fotos se ve moita pedra, esta desapareceu. Non se sabe se a levaron os comuneiros, únicos autorizados a facelo tal é como se aprobou en asemblea, ou a levaron foráneos, con ou sen autorización.

luns, 8 de marzo de 2010

Pleno con máis pena que gloria

Como cada venres, último de mes, celebrouse no ¿salón nobre? do Concello outro pleno insufrible onde o goberno e a oposición se chamou de todo, menos guapos. O publico fomos testemuñas unha vez máis de intervencións fora de quenda, insultos e graves acusacións, se antepoñela palabra presunto ao que o señor alcalde non foi quen de poñer coto ou non quixo.

Unha vez máis salvase desta queima pola súa comisura e saber estar, o represéntate de IPS. Ao respecto das graves acusacións que se verteron, só a Xustiza é quen de dirimir os presuntos delitos que uns e outros se cruzaron, nunca un cargo público e moito menos un político da rúa.

Como xa dixen noutro post, dependendo do lado que se está os que outrora criticaban este tipo de intervencións, hoxe apúpanas porque non van dirixidas contra os seus. Os que se sintan aludidos é problema seu, pero o salón de plenos non é unha taberna para largar mitins insufribles, é para tentar solucionar os problemas dos sonenses, e se ese é o seu único argumento, porta. Seguro que outros loitaran para entrar.

Reflicte La Voz de Galicia, que a moción presentada polo equipo de goberno sobre o decreto de galego foi unha disputa estéril e tediosa e non mentiu, só que non se quixo mollar a fondo e deixou no tinteiro moitas das intervencións do equipo de goberno.

Non se pode criticar ao inimigo político de non respectalo galego, nomeouse sibilinamente a Corina Porro e Carlos Negreira, cando, e iso é o incrible, os seus alcaldes que gobernan gracias a unha coalición non adoitan precisamente falalo demasiado en público. Tampouco vin que iso fora unha causa que imposibilitase o pacto ou que votasen en contra nunha moción: Os socialistas néganse a apoiar a aplicación do novo texto sobre o emprego do idioma.
Podería traer exemplos doutros incumprimentos ou políticos e militantes de partidos que acoden as manifestacións aprol do galego, e despois falan cos seus fillos en castelán e algúns, mesmo non ten empacho e dicilo publicamente ou en bitácoras.

Lamentablemente estamos nun mundo tan globalizado, que é imprescindible falar máis dun idioma e diso os galegos que fomos emigrantes, sabemos moito. Non vou dicir que sobrevivín no estranxeiro falando só galego ou castelán porque mentiría, aínda que algo de verdade hai, xa que tiven a fortuna de que os mandos chapurreasen algo o castelán e tamén, porque eramos varios galegos. Só cando me propuxeron a posibilidade dun ascenso, fun antes a unhas clases de inglés. Agora, escoitar no pleno dicir que alguén sobreviviu 20 anos nos Estados Unidos falando só galego, antolláseme algo difícil e non teño motivos para dubidar, pero sei do que falo porque tamén estiven nese país.

No que si coincido é que a día de hoxe non creo que a Xunta estea preparada para implantalo inglés nas aulas, pero supoño que haberá que empezar por algo, iso si, sen descoidalo noso fermoso idioma. Estou orgulloso de falalo aínda que non me servise na miña vida laboral, pero é algo noso e iso que cando fun a escola, estaba proscrito. Será un sen sentido, pero é a pura verdade.

Oporse ao inglés aducindo que quen queira aprendelo ten moitas posibilidades agora coa TDT, non é verdade, é certo que no estranxeiro as películas son en versión orixinal, pero é que ademais estudan outro idioma estranxeiro. Con ese argumento e dado que levamos 25 anos coa TV e Radio Galega, ¿por que cada vez se fala menos o galego?.

Claro que as becas no estranxeiro como tamén se dixo, sería unha boa ou mellor opción, pero ¿habería posibilidades para todos, ou só para uns cantos privilexiados i enchufados?.

Re-aprobouse novamente a piscina municipal, que máis que piscina vai parecela obra do Escorial. Retomase o proxecto dun arquitecto que no seu día non era ben visto pola oposición, pero que o tempo parece que cura tódalas feridas. Din que o falar non ten cancelas.

Tamén se aprobou a ordenanza do prezo público pola prestación do servizo do fogar, con novo enfrontamento entre o goberno e o PP. A oposición dixo que facía catro meses que xa levaran ese punto ao pleno, pero que por boicotealos se-lle rexeitara. Foron a máis ao dicir que, «é a mesma que traen agora». A portavoz do goberno díxolles que tiña modificacións e que unha das causas polas que no aprobaron, ese día era porque se esixía aos beneficiarios domicilialos pagos e agora non, e  que tamén poderían pagar a mediados de mes.
Se só meteron esas pequenas modificacións, non ían facer un copia e pega, ¿por que no seu día non propuxeron iso. Sóese facer moitas veces para mellorar unha moción, sexa defendida polo goberno ou pola oposición e así é como debería ser sempre, non rexeitar todo porque temos maioría, e punto.
Digo isto, porque estiven presente no pleno onde se rexeitara a ordenanza, e nada disto se dixo.

Cada vez pregúntome máis se estamos nunha Democracia ou Ditadura, vendo casos como que para unha expropiación forzosa se recorra a unha Lei que a Lei da Memoria Histórica aínda non derrogou ¿non interesa?.
Digo isto, porque en Portosín despois deste pleno tres casas poden correr serio perigo de ser demolidas para facer unha urbanización e aínda que a lei sexa clara: «para proceder á expropiación forzosa será indispensable a previa declaración de utilidade pública ou interese social do fin a que hai de afectarse o obxecto expropiado».
Pregunto porque non estou moito ao loro en canto a expropiacións, vendo como no seu día a Consellería do Medio Rural lle atravesou o agro a meu pai coa pista. Neste caso ¿é para algo de utilidade pública, un ben social ou privado para algúns facer uns un negocio?. ¿Estes edís votarían igual se esas casas fosen súas ou dun familiar? e sabendo como no seu día, a Xunta bipartita non estaba de acordo.

Aprobouse crear un viveiro de empresas, que o PP votou en contra aducindo que en Boiro con ser Boiro, tan só se crearan tres empresas baixo esa modalidade. Síntoo dicilo, pero non me pareceu un argumento sólido para oporse. Malo oporse só por oporse e xa esquecín en cantos plenos, e xa levo acudindo a uns cantos, vin esta ridícula forma de proceder por parte dos tres partidos maioritarios.

Coma remate do que dou de si o pleno e pola que nos pode caer aos veciños de Nebra, toca falar da autovía que solicitaron as nosa "eminencias" para levala ata as portas do Concello. A pesar da miña retórica a cousa é moi seria.
¿É necesario ou precisa esa autovía ata Porto do Son, para catro coches que acoden as praias no verán?. ¿Alguén sufriu algún atasco dende O Son ata Portosín? Non, porque empezan máis ou menos a altura da Gafa e só son dous meses señores, dous meses.
De levar isto a cabo máis o polígono industrial, Nebra vai quedar moi tocada, pero xa estou vendo moit@s Xudas Escariotes, que dende a oposición moita esbardallar e a hora da verdade tod@s son iguais.

Onde non houbo acordo foi no nomeamento de novas rúas do Concello, parece que agora se non se nomea un "Consejo de Expertos da Universidade", non somos nada, cando e así se dixo no pleno, noutras ocasión non fixo falla chamar a ningún sabelotodo.
Dous datos, por non estenderme demasiado, ¿por que haberá curas de primeira e segunda para propolos para algo? Digo isto, porque cando o portavoz do PP nomeou a un (non lembro quen), produciu certa incredulidade e sorpresa.
Relativo á proposta que fixo o PP cando estaba no goberno, para que os veciños aportásemos nomes e propostas, díxose que non calara na xente e que só recibiran tres cartas, que propoñían a un familiar directo, ou familiares. Agardo que se me desculpe se non son preciso, pero por mor do balbucir da xente, non puiden escoitar ben.
Do que non teño ningunha dúbida é que nada se dixo de haber recibido correos electrónicos na dirección habilitada. Dirección a que eu mande o que expoño abaixo. A pregunta é, ¿ninguén abriu ese correo? ¿quen tiñan acceso a el? Non quero sen malicioso e pensar que alguén o borrou.

Non quería rematalo post sen falar dunha crítica que recibiu o PP, por haber abandonado o pleno anterior e haber cobrado a asistencia. Dous apuntes, notase que quen fixo a pregunta non gusta precisamente da cor dese partido, i está no seu dereito, pero é que resulta que houbo moitos plenos que os edís abandonaron antes de tempo. Ou sexa, que se queremos criticar, critiquemos, pero a todos por igual.
Isto mesmo pasa no Parlamento Galego ou do Estado, onde non é nada raro ver aos señores deputados falando solos con unhas cadeiras valeiras, iso si, despois os que se sentan nelas, pagáselles relixiosamente cos nosos impostos, e cando tocan eleccións, votámolos igual.
Por suposto que non comparto estas actitudes nin agora nin antes, aínda que recoñezo que os equipos de gobernos a veces buscan esas saídas, sobre todo cando por algunha circunstancia ven que esa día non teñen a maioría precisa para logralos seus obxectivos.
A miña recomendación sería que a próxima se queren levantarse do pleno, o fagan, pero que queden no medio do público para aguantar estoicamente como nos tocou a nós aguantar o outro día, ata a unha e pico da madrugada. A min tampouco me gusta o que pasa na comunidade, pero acudo sempre as asembleas, iso si, sen inscribirme, porque nada do que diga vai constar en acta e porque tampouco se decide nada.

Imprimir mensaje - Windows Live Hotmail http://co112w.col112.mail.live.com/mail/PrintShell.aspx?type=messag

Nomeamento de rúas
De: Francisco Calo Garcia (xxxxxxxxxxxxx@hotmail.com)
Enviado: lunes, 31 de diciembre de 2007 20:04:16
Para: propostanomeruas@yahoo.es

Quixera facela miña aportación a oportunidade histórica que a Corporación municipal nos ofrece para dar nome as novas rúas do Concello.
A miña proposta ou propostas, xa que son varias, son relativas a loita agraria que se viviu neste Concello a principios do Século pasado e que tan lutuosos feitos se deron na miña parroquia.
Creo sinceramente que Xenerosa Vidal, Francisca Carou, Ramona Suárez, Rosa Cadorniga e Antonio Sobrado, que derramaron a súa sangue na ponte de Cans en defensa dos dereitos de moitos e moitas sonenses, merecen como mínimo ese pequeno recoñecemento en varias desas rúas.
Outras propostas serian de selo caso, dar nome a unha praza como: Praza da Liga Agraria de Nebra ou dado que se vai remodela carreteira de Cans, nomeala como: Avenida da Liga Agraria de Nebra.
Grazas por permitirnos expresalas nosas opinións e agardo que os nomes que se escollan, acaden un amplo consenso.
Atentamente: Francisco Calo Garcia. Promotor e organizador da colocación do monolito e dos actos en homenaxe a ditas vítimas.

mércores, 9 de decembro de 2009

Curiosidades do pleno

Velaquí a crónica do primeiro pleno presidido polo señor Pastor, na que os trasnos "impedíronlle" poder gravalas súas primeiras verbas como alcalde (un dos cabalos de batalla que prometía, gravar todos os plenos).

Mentres no último pleno presidido por Tomé, este tivo unha paciencia infinita con parte do público asistente (nalgúns casos con afiliación política ou simpatía) que cos seus comentarios e aplausos impedía o normal desenrolo do pleno, neste, o novo alcalde, foi taxante, aínda que a min, sooume a ameaza: «abstéñase o público de intervir no pleno ou será expulsado». Iso si, deixou claro que ao remate poderían intervir... sempre e cando non rematase antes das doce.

Acudín a varios plenos e nunca vin que o publico puidese intervir despois desa hora, a única excepción vivina nese pleno de Tomé, e aínda así a oposición e algúns militantes increpárono. Tampouco lembro que se debatese pasadas as doce e media como pasou ese día. Coido que houbo fai anos un que rematou as doce e retomouse o sábado, se non lembro mal, para non perder unha subvención. Vexan se non, a valoración do pleno de novembro que fixo o señor Guerrero, alcalde de Noia, na súa bitácora.

No canto ás retribucións aprobadas hai moito que falar. Agardo que XAMAIS un partido obteña os dezasete edís que compoñen ata o momento a corporación municipal de O Son, porque vistas a explicacións que se deron para xustificalas cinco adicacións: «é que como agora somos nove». Cantas habería de ser os dezasete?

Tampouco podo pasar por alto que se digan "mentiras piadosas", como quen foi o primeiro edil que máis barato saíu ao pobo, se foi así, é porque cobraría doutro lado e suponse que renunciou ao soldo máis baixo. O que non se dixo é que esa renuncia cobrouna outro. Estes políticos!

Por último pareceume unha "perrogullada" escoitar que seguro que a moitos lles «jode» que unha muller gañe máis que un home (sic).

Criticaban ao anterior goberno que nos convocaba e que saia na prensa dicindo que obras ían facer sen darlle a oportunidade de poder expola súa. As primeiras de cambio, devolvéronlle a pelota.

Como ben saben os que me coñecen militei moitos anos nun partido e dende el criticabamos que a máxima dos gobernantes era poñernos catro farois, e agora resulta que na primeira decisión que toman, caen no mesmo erro. A desculpa esgrimida para poñer o alumeado dende Queiruga a Baroña foi, «que como a Xunta non pon beirarrúas...». Supoño que nesa crítica irá incluída a actual... e a anterior.

Tamén se dixo que era porque moita xente facía esa ruta para pasear, aínda que disinto un pouco disto, eu non vexo esa xente e levo pasando por aí unha tempada. Iso si, vexo a un señor maior acompañado dun cadeliño pequeno moitas veces, camiñando sempre co seu chaleco obrigatorio, cousa que poucos fan.

Non creo que ese alumeado sexa só para dar servizo a un bar do entorno como se dixo, pero tampouco era para replicarlle logo coas luces do Empalme a Cans ou do cemiterio de Miñortos. É certo que os finados non precisan o alumeado, polo que é de supor que se puxo polas súas familias que acoden a el.

A anécdota produciuse cando se denunciou un presunto pago ilegal, en vez de facelo a portavoz do goberno, anticipóuselle o segundo portavoz (?). O alcalde non lle quería dala replica á edil criticada, aínda que ao final tivo que "claudicar".

Un último apunte, como ben digo foron varios aos plenos que acudín e quedeime con este detalle, mentres noutras lexislaturas todo que dicía un integrante do novo goberno eran "barrabasadas", neste pleno todo foron "gracias", mesmo cando meteu a pata. Nunca cuspades para arriba...

A destacar as intervencións comedidas e respectuosas efectuadas polo edil de IPS, algúns ou algunhas de seguro que se levaron máis dunha sorpresa.

domingo, 31 de maio de 2009

Gresca no pleno de O Son

Parece que o último pleno estivo algo revolto e houbo un pouco de mar de fondo. Mágoa non poder acudir e falar do acontecido en primeira persoa, polo que teño que deixarme "influenciar" pola prensa.

Dous asuntos parece que levaron a bruma ao interior do salón de plenos. O primeiro un plan de urbanización da unidade de actuación nº 2 de Portosín e o segundo, obrigar ao Concello comprar unha leira para darlle acceso a varias casas.

La Voz de Galicia: La adquisición de una finca para abrir un acceso a unas casas en Miñortos enfrentó a PP y BNG
El Correo Gallego: El pleno abre expediente a una unidad de actuación de Portosín

Nunha "cacea" parece que se pescou un plan que non se axusta a legalidade e que as irregularidades están recollidas en informes xurídicos emitidos por Política Territorial e por un letrado.

O curioso é que a vista dos informes os mariñeiros e mariñeiras enrolados neses cinco barcos e dedicados ao mesmo tipo de arte, teñen serias dúbidas de se se axusta á "talla legal".
Os enrolados no PP (6) optan por considerala ilegal e votan a prol (devólveno ao mar), os do PSOE (5) votan en contra (prefiren vendelo aínda que os multen) e os do BNG, AVS, e Independentes de O Son (6) abstéñense (véndeno ilegalmente de porta en porta).

Aínda que na votación non coincidan, si o fan na súa "sentenza":
«La oposición advirtió que la promotora afectada podrá pedir daños y perjuicios al Concello» (sic)
Sexamos un pouco máis serios, se tan seguros están que a promotora pode pedir danos e prexuízos, como poden botarlle a culpa a seis concelleiro/as de "hipotecalo futuro do Concello" e eles, once "lavarse as mans"?

A segunda arte empregada no pleno, parece que foi o "engado". Neste tipo de arte enganase ao peixe e ao persoal, botándolles de comer para acotío rodealos cunha rede ou unha mentira.

Para La Voz de Galicia foi o seu titular: «La adquisición de una finca para abrir un acceso a unas casas en Miñortos enfrentó a PP y BNG». Para El Correo Gallego só foi un dato: «Tema polémico».

Non coñezo a zona da polémica e tampouco coñezo o informe que presenta o alcalde contrario á compra da leira, pero opino igual que el, que isto senta un precedente, polo menos no noso Concello, e outros particulares poden a partir de agora pedilo mesmo. Pero falemos antes do que me parece o engado.

Na Galiza rural, ou polo menos en Nebra, tiñamos antes da chegada da parcelaria tres tipos de accesos ás nosas leiras: de carro, de pe ou carril.
  • Os de carro eran camiños ou corredoiras con acceso directo ás leiras. Se daban para un solar moitos donos aproveitaron para facela súa casa ou para vendela, xa que estaba ben valorada.
  • Os de pe eran corredoiras onde non pasaba un carro e só se podía acceder andando ou cunha carretilla, tiñan outra peculiaridade, atravesaban leiras sementadas por unha liña imaxinaria.
  • Os carrís daban acceso a pe todo o ano, e co carro en datas concretas: pechábanse ao remate da sementeira do millo e abríanse na recolleita. Non se volvían a pechar ata a nova sementeira.
En La Voz encontrámonos con dúas contradicións, por unha parte o alcalde afirma «que si hai un camiño que comunica esas vivendas polo que poden circular coches» e pola outra, unha das "afectadas" pide que lle diga «onde teño eu o acceso rodado, mentireiro».

A pregunta é, por onde levaron os materias para facelas casas?
Polo ar? Non creo. Por un camiño de pes, nunha carretilla? difícil de crer.
Por un carril? Imposible de crer, pero si viable. Aquí é onde pode estalo problema, ao ser carril o Concello non pode cubrilo cunha capa de cemento ou chapapote.
Por un camiño? Supoño que si, e seria o máis razoable. Neste caso se pasaba un carro, pasa un tractor e pasa un coche se se dota de chapapote.

En Nebra foron innumerables os veciños que padeceron a lacra de non ter un acceso digno as súas casas e sen poder facelo en coche, a pesares de que daban directamente a camiños.
Antigamente o acceso á praia da Aguieira e a dúas casas dende o Empalme, era unha auténtica corredoira e un río. Sen anchearse nada aí esta.
Partindo do cruceiro que hai antes da Igrexa, outra casa botou lustros. Outra que está moi preto xa non botou lustros, botou decenios.
En Queiro fíxose unha pista e déuselle servizo a catro casas, deixando colgadas a dúas. No seu día, e cando militaba no BNG, pedín rematar con esa discriminación e aí seguiu ata a chegada da parcelaria.

Se estas casas foron feitas presuntamente en leiras que só tiñan acceso mediante carril a pregunta é, por que o Concello e os veciños temos que mercarlle o acceso? Partindo desta premisa, agora calquera propietario pode empezar a considerar como solar calquera leira, visto o visto.

Se o alcalde e o seu grupo actuase coma a directiva da comunidade poderían facelo mesmo que fixeron co agro de meu pai, expropiarllo para abrir unha pista e o que é máis incrible, agora non ten acceso e en cada asemblea que lle pregunta polos motivos que os levaron a facerlle iso, inda teñen máis razóns que el para xustificarse.

domingo, 29 de marzo de 2009

Valoracións dun pleno

Despois de varios anos sen facelo volvín a presenciar un pleno en directo. A verdade é que me causou unha estraña sensación de perda de tempo.

De primeiro decateime que non había cámaras de TV, algo que se prohibira na anterior lexislatura cando gravaba os plenos o desaparecido Canal Tambre, pero coidaba que agora si se gravaban. Por outra parte, a oposición queixase porque tampouco se gravan en cinta.

Non sei cales son as causas reais para que non se graven, pero o que si me decatei é que apenas houbo queixas na redacción dos borradores das actas. Todo o contrario de cando se gravaban que había moitas máis queixas.

Isto lémbrame que sendo secretario na comunidade avoguei por gravalas asembleas, para que os comuneiros fosen conscientes de que as actas ían ser un fiel reflexo do debate, pero os ex-compañeiros deixáronme só cando unha comuneira se queixou e agora nin os gravan.

Xa se sabe que cando un está en política ten a boca demasiado solta, pero creo que nun salón de plenos se deberían gardar un pouco as formas e evitar no posible, entrar ao insulto e a descualificación persoal.

Do mesmo xeito que cando se fan acusacións, hai que ir ben documentado e non caer no de sempre "dixéronme, escoitase" ou pensar, e matizar ben, o que se vai falar. Isto pasou en varios momentos do pleno con ocasión do tema sobre o suposto boicot dende o Concello a unha reunión de Tamaria, que se permita o uso irregular do piano da Casa de Cultura de Portosín ou o tema do soldo do alcalde.

Nos dous supostos anteriores de ser verdade, enténdoos en boa medida, pero coido que tamén é necesario presentar esas probas ou argumentos validos.

No primeiro caso as probas serian levar a aquela xente á que presuntamente se comunicou a cancelación da reunión. Acusar é moi doado e sei perfectamente do que falo porque o vivín en carnes propias.

No segundo caso outro tanto, se é certo que alguén fai un uso irregular do piano, pódese comprobar achegándose á Casa da Cultura para comprobalo.

No terceiro caso non sei que aportaba ao pleno ou aos presentes, que o alcalde tivese que desmentir que non lle dixera a ninguén que só cobraba 1000 €. Non sei o que cobra, pero toda a corporación sábeo perfectamente e por iso non entendo o debate estéril que xerou esa pregunta. A miña dubida é se lle farían a pregunta, se dixese que gañaba moito máis.

Tampouco se entende as alusións ao troco de goberno na Xunta de Galicia, sen vir a conto por parte dun grupo da oposición.

O concelleiro de Alternativa Veciñal presentou unha moción para que se conectase a auga municipal aos veciños da aldea de Mantoño e retirou o apartado onde pedía que tamén se lles conectase o saneamento, porque o seu problema é a comunicación dos pozos negros cos de beber. Isto lémbrame a facilidade coa que se dotou de auga a segundas vivendas no rural, especialmente as construídas por inmobiliarias e se deixa sen conexión as "nosas" ou de primeira e única vivenda.

Outra cousa que me estraña e que algúns concelleiros apenas abren a boca, e nin tan sequera levan unha pequena petición da súa parroquia. Non quero imaxinarme que non teñan ningunha falla.

Nebra sempre aportou concelleiros en todas as lexislaturas e nesta senta dous na oposición, pero tampouco fixeron ningún rogo ou pregunta sobre asuntos parroquiais. Tampouco teremos ningunha eiva?

Para o próximo pleno haberá que tomar algúns apuntes para ser un pouco máis preciso nas miñas valoracións.

O que recolle a prensa do pleno: