Amosando publicacións coa etiqueta Vertedoiros. Amosar todas as publicacións
Amosando publicacións coa etiqueta Vertedoiros. Amosar todas as publicacións

xoves, 25 de setembro de 2014

Información do Concello sobre o Punto Limpo

A pesar de estar na nosa parroquia e que comezando polo presidente que non o quería ou de feito atrasou máis de medio ano levalo a unha asemblea, a xente segue tirando a "SÚA MERDA" no monte que é de todos, cando non a tira en propiedades que non son súas.
Isto está guindado onde varias empresas tiran, non sei se aprobado pola comunidade e a cambio de que, nalgúns casos refugallos de obra, teño fotos, e noutros que seria o normal, terra vexetal.

Agardemos que recapaciten porque segundo vin en zonas que teñen colocados carteis, en Nebra, desde logo non, a sanción máxima esta taxada en 1,750.000 €, e nesta ocasión o sancionado igual non ten a quen acudir para que, como pasou nunha ocasión o salven de pagar 300.000 €, por queimar na SÚA propiedade (friso) un plástico moi contaminante, aínda que polo visto agora non dá pagado o favor.

Así é como algúns defenden aos que contaminan a NOSA TERRA!!!

Vertedoiros ilegais en Puílla


mércores, 30 de novembro de 2011

Vemos a palla no ollo doutro e non vemos a viga no noso?

Preguntas feita polo BNG no Pleno do 4 de novembro de 2011
Que conste que a miña labor non é defender a ningún político ou goberno, iso foron outros tempos, pero con que moral se pode facer esta pregunta dende a oposición: «Que están a facer ao respecto dos verquidos incontrolados que se están a realizar no lugar de Quintáns-Nebra?», despois de non facer nada dende o goberno.

Algunhas mostras de como estivo a zona durante a etapa do anterior bipartito.

31/03/10: Lavado-de-cara

21/07/10: Agora-calamos

06/08/10: Isto-xa-cheira

29/11/10: Veciños-de-segunda

03/12/10: Negome-ser-complice

martes, 22 de novembro de 2011

Respéctennos, por favor!!!


A última vez que os veciños e veciñas de Quintáns respiramos un pouco aliviados e «desfrutamos» con esta zona así de limpa e relucente foi o pasado 30 de decembro, aínda que todo hai que dicilo, houbo quen antes de comelas uvas deixounos varios agasallos.

De novo o Concello ou a empresa adxudicataria tiveron a ben cumprir co seu cometido, que non é outro que evitar que isto se converta nun perigoso foco de infección e que os forasteiros non se leven unha paupérrima imaxe de Porto do Son. Fai unhas noites mesmo había restos de tellas de fibrocemento altamente contaminantes que por sorte non duraron moito, xa que ó día seguinte alguén as retirou. Descoñezo quen foi, porque foi o único que se levaron e non valían para aproveitar. Fíxense o perigoso que é este material, que agora só poden proceder á súa retirada das obras empresas homologadas.

Veremos canto dura a ledicia na casa do pobre, porque o máis incrible de todo isto é que como veño mantendo, a maioría desta «merda» tráena cando lles ven en gaña empresas e veciños doutras parroquias, por iso pido que se nos respecte e que como mínimo, cando veñan a tirar algo o fagan só os días habilitados. Estou seguro que a ningún lles gustaría que os denunciemos, algo que non fai moito lle pediron dous responsables de medioambiente a un veciño «chega só con pasarlle a matricula do infractor», porque seguramente despois os malos seriamos nós.

luns, 28 de febreiro de 2011

É isto o que queremos?

Aproveitando o tempo primaveral que tivemos onte decidín dar un paseo polo monte e así, pasiño a pasiño como quen non quere a cousa, fun dar a Sendia, pero o meu gozo quedou nun pozo ao atoparme con estas imaxes. No meu subconsciente supoño que os veciños desta aldea de Nebra, aínda que vivan no monte como se di, pagan relixiosamente o imposto da vasoira, pero parece que o cobrarllo non vai aparellado co servizo que deben recibir.
Se non estou trabucado, entre os días 15 e 16 tivo que pasalo camión que recolle todo este tipo de refugallos, pero ollase claramente que non o fixo e ademais que todo isto leva aí moito máis tempo. Non digo que cada 15 días teñan que pasar por estas aldeas para evitar facer viaxes de balde, pero si que chegaría con que os compañeiros que acoden a baleiralos contedores puntualmente lles pasasen aviso e así evitar este lamentables espectáculos en plena natureza.
Con estas outras fotos tamén trato de amosala pouca conciencia medioambiental que existe ultimamente en moita máis xente do que pensamos e que presume de ir pasar un día ao ar libre e despois deixa espallada polo monte a súa merda. Neste caso con moito máis delito, xa que como poden comprobala distancia onde tiñan o contedor e onde tiraron esta bolsa que contiña unha caixa de pizzas, varias de plástico para frituras e botes de refresco, era mínima.
No circulo vermello atopábase esta caixa de pílulas aínda sen abrir e como sabemos, altamente contaminantes se se tiran en plena natureza. Non debía levar moitas horas no sitio porque o sábado estivo a chover e aínda estaba relucente.
Nestes casos non me parou o xenio no corpo e decidín retornalos meus pasos para tirar dentro do contedor a bolsa e recollelas pílulas para entregalas nunha farmacia para o seu reciclaxe. Lamentablemente ao longo desta pista que nos leva cara a Montemuiño e a Laranga, as beirarrúas están estradas de botes e botellas de plástico, e carón desta aldea, preto do cruceiro de Ramona, atopeime estas rodas de tractor e varias caixas de ferro.
Esqueceume engadir esta foto, tal vez xa bastante fastidiado polas demais. Isto tamén esta preto dese cruceiro e do río do que se abastece o concello.

venres, 31 de decembro de 2010

nin pola uvas agardaron!!!

Mil e un títulos pasan pola miña mente para encabezar este novo esperpento, con permiso do gran D. Ramón María del Valle-Inclán y de la Peña e aínda que non faltará, coma sempre, quen lle bote a culpa ó fotografo por amosalas nosas vergoñas.

Podería ser que o "paisano" abordo do seu tractor actuase con nocturnidade e aleivosía, pero non, fíxoo a plena luz do día, xa que cando marchei para Noia ás 10 da maña non había nada, e cando recunquei ao mediodía, aí estaba o agasallo de aninovo, polo que só me resta dicir: que pouco dura a ledicia na casa do pobre.

Obviamente neste caso concreto desculpo ás autoridades e á empresa de recollida, pero como o Concello non tome medidas, isto vai parecer un pobo sen Lei. A parte da creación do tan demandado Punto Limpo, ao mellor coma efecto disuasorio poderíase colocar un cartel advertindo que depositar enseres fora dos días sinalados carrexará unha sanción, porque isto non pode ser.


Neste outro caso si que non se salva o Concello nin a empresa que xestiona a recollida do lixo, porque isto leva así máis dun mes e se ollan as fotos ampliadas, comprobaran que non esaxero. Para quen no coñeza a zona, engadir que isto está a tan só 50 metros da praia da Aguieira.


 

venres, 3 de decembro de 2010

Négome a ser cómplice


Son as 10:36 h. do venres día 3 de Nadal, unha empresa dedicada á venda de electrodomésticos e mobles da Vila acaba de deixalos sofás, cartóns e plásticos que adxunto, cando para recollida de voluminosos teñen un teléfono ao que chamar; no caso do cartón tíñan un contedor especifico a menos de cincocentos metros e o plástico, por educación e civismo, deberían metelo no amarelo.

Pola miña parte xa pode te-las mellores ofertas, porque non me vai pillar. Négome a ser cómplice de empresarios que só miran o seu, porque se vivise na casa que sae nas fotos ou tivese o seu establecemento enfronte, sería o primeiro en protestar.

Lémbrolle ás empresas que os días habilitados para depositar este tipo de enseres, son o primeiro e terceiro martes de cada mes, xa que "oficialmente" se recollen ao día seguinte, e aos políticos ou empresa contratada, que o mes de Santos tivo catro mércores, pero aquí non se recolleu nada. Veremos quen se aburre antes!!!

Vergoña de políticos _2


luns, 29 de novembro de 2010

Veciñ@s de segunda?

Foto: El Correo Gallego
Sen citarme, onte El Correo Gallego fíxose eco de novo do vergonzoso vertedeiro incontrolado con todo tipo de refugallos que día tras día e semana tras semana temos que aturar os veciños de Quintáns. Isto quere dicir en contra da opinión dalgúns, que os blogues son algo máis que un ego persoal e que os lee moita xente.

Supoño que os nosos representantes no Concello tamén, aínda que polas veces que-lles saquei as cores parece que moito caso non nos fan. Se a isto lle engadimos que Nebra aporta ao actual goberno dúas edís e que algúns compañeiros o ven tódolos días, ollase claramente que a cousa agora non vai con eles, especialmente cos que no seu día dende a oposición tanto parecían preocuparse.

Os veciños de Quintáns estamos tan vendidos, que nin a oposición na súa labor de fiscalización ao goberno se fai eco, todo o contrario da prensa: La Voz de Galicia ou El Correo Gallego. Supoño que en maio uns e outros se preocuparan moito máis..., pero deles.

Podería ser que fósemos os únicos que estéemos nesta tesitura, pero é que os de A Insúa en Baroña, e As Pardiñas en Miñortos, por poñer dous exemplos a carón da estrada, por non citar aldeas interiores, tampouco nos andan a zaga, aínda que nós levamos tódalas honras.

Fai uns días retiraron un contedor subterráneo no casco urbano, aducindo entre outras cousas, que fora porque os veciños depositaban as bolsas fora deles, pois apliquen o conto. Os veciños de Quintáns tamén pagamos coma os da Vila e non temos porque aturar isto, sobre todo porque o 99,99% destes refugallos son tirados por empresarios sen escrúpulos e xente que non é de aquí.

Non quixera rematar se denuncialo forte cheiro que agora tamén desprenden os contedores e iso que estamos no outono. Se chegamos a estar no verán, cómenos as moscas.

Ligazón directas a outras entradas polo mesmo tema:
Isto xa cheira
Agora calamos
Nesta última poden ollar o que opinaba dende a oposición un dos partidos que agora nos goberna.

venres, 6 de agosto de 2010

Isto xa cheira!

A nota é ben clara: Horario de deposito de lixo 20:00 a 22:00. Aclarado isto o que non pode ser e que veña xente ou empresas de dubidosa reputación e de tódolos recunchos da bisbarra a tirala súa merda a Nebra e por riba, o fagan fora do horario e fora do contedor especifico, sen que este estivese cheo.

Considéroa non só unha falta de respecto sobre todo para os que vivimos aquí, se non que se esta a dar unha moi mala imaxe do Concello, que como xa dixen aquí, agora os flamantes gobernantes deben revirala vista cando pasan ao seu carón ou están cegos?. Sinto ser tan duro pero máis duras son as imaxes e perigoso o que aquí se tira.

No circulo roxo pódense ver algúns restos deste materiais, que poden ollar na seguinte foto moito máis preto. Fibras de vidro, que precisan dunha recollida selectiva pola súa perigosidade para o medio ambiente e así, podería tirar non unha, se non varias. Despois hai outros elementos, que coas choivas remataran no río de Quintáns que esta a escasos metros, curiosamente do que se bombea auga para medio Concello.


Non é que a empresa de hoxe tirara residuos perigosos, aínda que non me puxen a mirar dentro da bolsa que depositaron a carón do contedor de residuos orgánicos, supoño que é herba de xardín, pero fíxense a que hora o fixo e como agora os responsables da empresa de recollida, se o teñen a ben, deberan recollelas plantas que lles guindaron fora.
Nas fotos non se aprecia o nome da empresa, pero chega dicir que se dedica a xardinería i é da terra de Castelao, concretamente da parroquia onde fai anos tiveron un grave conflito co arcebispado por quitarlles un cura.
Non ten nada que ver co tema, pero sempre me gusta comentar algunha anécdota cando se da o caso. Un dos cura qe-lles mandaran para suplir esa baixa, fora un que xa estivera aquí: Don Arturo.



Se se fixan nas imaxes da anterior entrada e nestas dúas, tiveron que trocar de posición os contedores i esas dúas bolsas, seguen aí como mínimo dende o 21 de xullo. Tamén se pode observar que a merda xa ocupa parte da estrada i esparrase por todo, leiras, estrada, camiño, etc.


Esta última tomeina o día catro, despois de comprobar que o martes, primeiro día do mes de recollida obrigatoria, non o fixeran. Segundo me comentaron os veciños, porque ao parecer a empresa concesionaria non está obrigada a facelo, porque din que é cousa do Concello. Eu non sei a quen compete, o que sei é que os veciños pagamos os nosos impostos coma os do casco urbano e temos que aguantar isto.
A foto foi tomada entre lusco e fusco e por mor desa escuridade, o resto non tiña unha boa calidade, pero dicir que o día cinco recolleron parte do que había neste tramo da estrada i ese plástico negro. Entón a pregunta é, a quen compete recollelo resto?


mércores, 21 de xullo de 2010

Agora calamos?

A praga de vertedeiros incontrolados: A nadie se le escapa que los vertederos incontrolados son un riesgo para la salud pública, un foco de contaminación para el agua y el aire, además de un cúmulo de incomodidades para la ciudadanía. Aún así, es muy difícil erradicarlos, como este caso, en el entorno del río Quintáns, en O Son.

Eu tamén opino que os vertedeiros incontrolados ademais de ser un risco para saúde pública, un foco de contaminación para a auga e o aire, son unha excelente oportunidade para que as oposicións, sexan do signo que sexan, fagan «política da barata» contra os gobernos de quenda.
Isto é o que sucede acotío en calquera Concello da bisbarra se miramos un pouco a prensa, e foi o que sucedeu no noso non fai moito tempo. O malo é que unha vez que acadan as rendas do poder, sofren tal cegueira, que onde antes vían de todo agora non ven ren. É coma se se puxeran unhas anteolleiras como as que antigamente se-lles poñían aos animais de carga. Poñer burros, sería pola miña parte unha falta de respecto a estes animais que tanto fixeron por nós, e se-lle pagou tan mal.
Non é cousa tamén de acusalos que non vexan os que proliferan polos nosos montes ou a carón de camiños e pistas afastadas, pero os que están preto da estrada vémolos todos e todas, menos eles, e por desgraza os cegos e cegas.

No tocante ao cúmulo de incomodidades para a cidadanía, se todos «veciños, forasteiros, empresas, Concello i empresa responsable da recollida» respectásemos un mínimo as regras do xogo, non sería tal. Sabemos que cunha simple chamada, unha empresa acode a recollernos todo, aínda que descoñezo se cobra algo aparte do que xa-lle pagamos ao Concello, outra cousa son os refugallos de obras, que por iso si que hai que pagar. Se pola contra optamos por depositalos nos días e horas sinalados, todos sairiamos gañando, sobre todo os que vivimos a carón destes focos de infección.
O que non pode ser é o que esta a suceder ultimamente no vertedeiro de Quintáns, ao que se achega xente mesmo doutras parroquias e sobre todo, empresarios sen escrúpulos con refugallos moi perigosos e de obras.

As imaxes que amoso son demasiado elocuentes e para que vexan que non me tiro farois, decidín engadirlle data e hora.

Este mes segundo se pode ver nos carteis pegados nos contedores do Concello, a empresa responsable de recoller todo isto tiña que facelo obrigatoriamente o día 6, e onte, día 20, e non o fixo.

Mentres o día 6 noutras zonas recolleran todo «no que hai na Insua fixérano parcialmente ao deixalos restos dun wc branco», a miña rabia contida veu ao ver que aquí seguía todo igual. Menos mal que isto pasou días despois da enquisa telefónica sobre a recollida dos residuos, porque se non, aínda que non tivese culpa a pobre rapaza, íame escoitar.

Precisamente na noite do luns día 5, persoalmente levei os taboleiros que sinalei coas estrelas azuis. Parte dos sinalados coa vermella xa levaban aí varios días. Digo días, porque non podo probar que fosen semanas.



Por fin, cando onte chegou ese camión pensei que por uns días os veciños e veciñas de Nebra, pero principalmente os de Quintáns, que somos os que máis sufrimos o problema, respirariamos un pouco.


Iluso de min, máis parece que se non fora polas fotos, ata mesmo diría que sufrín un espellismo, pero non, aí segue todo case imperturbable.


Se pinchan sobres as fotos, poderán ver perfectamente como todo é parte da mesma merda que xa leva aí máis dun mes. Con todo iso, xa se nota que a xente non para de seguir tirando fora das datas sinaladas e seguiran...


Cando a miña lexión no xeonllo me permite dar un paseo, aproveito e teño por costume facelo coa cámara de fotos, así foi como cando pasei por Queiro o día de San Xoán, fixen a primeira foto e un pouco escamado e coa mosca trala orella, dóuseme onte por ir alí. Os xoguetes desapareceron «ao igual que a chatarra, hai xente que os recolle», pero o resto de refugallos seguen aí.


Mentres fai cinco anos nos prometían incluso facer dous puntos limpos, outros, como xa digo, protestabamos «nesa época andaba polo medio» contra este tipo de vertedoiros na prensa e mesmo ante o Valedor do Pobo. Non podo obviar que fai dous anos tentouse facer un punto limpo, pero inexplicablemente dende a directiva da Comunidade de Montes, segundo o ex-alcalde boicoteouse mediante atrasos inexplicables o debate da cesión dos terreos, Tomé acusa ao presidente dos comuneiros de Nebra de dilatar a instalación do punto limpo. O certo é que a primeira asemblea celebrouse seis meses despois da petición feita polo Concello e o presidente fixo todo posible, para que non houbese un debate claro, o que fixo que os comuneiros se marchasen antes de tempo polo desaire. Quince días despois, noutra asemblea presuntamente debateuse e aprobouse a cesión, que non foi ratificada pola asemblea xeral ou polo menos, non se dou a coñecelo contrato de cesión ratificado por ambas partes, o certo é que dous anos despois seguimos esperando por un punto limpo.

Una proba da posición que tiña daquela contra este tipo de vertedeiros e que hoxe sigo mantendo «os tempos non mudan, mudan as persoas», é esta foto antiga. Como poden ver, xa daquela acumulábase de todo, semanas ou incluso meses, «non se recollía, digamos como agora cada quince días». Neste caso actuarase despois de saír na prensa, por certo, o tractor marchou ben arramplado.


12 de novembro del 2005: O Concello da os primeiros pasos para construír dous puntos limpos en O Son
22 de abril del 2006: O Valedor do Pobo pedirá informes ao Concello sonense dos vertidos ilegais
Publicado por Paco do Martelo en 21:20 31/03/10 Lavado de cara
Publicado por Paco do Martelo en 21:32 02/04/10 Nin 24 horas