Amosando publicacións coa etiqueta Punto Limpo. Amosar todas as publicacións
Amosando publicacións coa etiqueta Punto Limpo. Amosar todas as publicacións

mércores, 14 de xuño de 2017

Así tratan algúns indesexables o noso monte e á parroquia

A pesar do cartaz colocado hai anos polos integrantes dunha ex-xunta reitora, co anuncio da posible sanción, os 2 primeiros «"gasallos» deixarnos no seu entorno, ou o que é o mesmo a uns 200 m. do Punto Limpo, o que ninguén quería e que resulta menos contaminante que estes feos xestos.

Por certo, xa lle valeu ao que o colocou. Como se pode ver ampliando a foto o aramio infiltrouse no pino. Un «pesco» discorrería mellor!!!

A primeira foto foi sacada a carón dos pasais do río de Queiro e a segunda na primeira encrucillada na Buarza. O día que haxa unha correntada a auga discorrerá pola pista desfacéndoa e o culpable é capaz de botarlle a culpa ao Concello por non limpala cuneta.

xoves, 25 de setembro de 2014

Información do Concello sobre o Punto Limpo

A pesar de estar na nosa parroquia e que comezando polo presidente que non o quería ou de feito atrasou máis de medio ano levalo a unha asemblea, a xente segue tirando a "SÚA MERDA" no monte que é de todos, cando non a tira en propiedades que non son súas.
Isto está guindado onde varias empresas tiran, non sei se aprobado pola comunidade e a cambio de que, nalgúns casos refugallos de obra, teño fotos, e noutros que seria o normal, terra vexetal.

Agardemos que recapaciten porque segundo vin en zonas que teñen colocados carteis, en Nebra, desde logo non, a sanción máxima esta taxada en 1,750.000 €, e nesta ocasión o sancionado igual non ten a quen acudir para que, como pasou nunha ocasión o salven de pagar 300.000 €, por queimar na SÚA propiedade (friso) un plástico moi contaminante, aínda que polo visto agora non dá pagado o favor.

Así é como algúns defenden aos que contaminan a NOSA TERRA!!!

Vertedoiros ilegais en Puílla


xoves, 15 de decembro de 2011

Desta vai en serio...?

Antiga canteira onde vai ser construído o punto limpo

Sen tempo non é, agora só toca esperar que antes do verán sonenses e forasteiros non teñamos que volver a apartala vista e tapala na nariz, cando pasemos polo entorno das "illas" onde están instalados os iglús de residuos sólidos urbanos. Tamén é de agardar que unha vez construído, uns e outros cumpramos coas normas que agora non estamos cumprindo, porque se non, seria tiralos cartos. Isto tamén vai polos que actuando con nocturnidade e aleivosía tiran todo tipo de refugallos en montes comúns, privados ou camiños.

A Xunta de Galicia, a través da Secretaría Xeral de Calidade e Avaliación Ambiental, realizará un investimento de máis de 296.000 euros para o financiamento do 100% do punto limpo de Nebra. A resolución publicada hoxe contempla un prazo de execución de tres meses.

As obras obxecto da proposta corresponden a aquelas dirixidas á adecuada xestión dos residuos en Galicia, nos concellos que teñen un orzamento insuficiente para financiar estes proxectos. Esta actuación atópase a medio camiño entre Portosín e Porto do Son, na zona chamada Agra de Bustelo, na antiga estrada de Cans, na parroquia de Nebra.

O punto limpo é un recinto preparado para que que os cidadáns poidan depositar neles os residuos para os que é precisa unha xestión específica, polo seu tamaño ou pola súa composición. Os obxectivos principais desta instalación son recuperar os materiais contidos nos residuos para a súa reciclaxe, evitar a vertedura incontrolada de entullos e voluminosos e separar os residuos xerados nos fogares que representen un risco para o ambiente. As accións fundamentais centraranse na disposición das instalacións xerais, casetas e almacén, colectores e sinalización. Tamén se executará un peche da canteira, un peche perimetral e unha porta de acceso. O proxecto tamén considera a urbanización e o axardinamento do contorno.

O Goberno galego, mediante a execución desta infraestrutura, responde, asegura a Xunta, "á demanda dos habitantes de Porto do Son, xa que na actualidade existe un servizo de recollida que non cubre as necesidades dos veciños, cunha periodicidade dun día ao mes".

Coa posta en funcionamento deste servizo preténdese concienciar á poboación para tratar de erradicar as verteduras incontroladas e evitar a imaxe dos utensilios na metade da rúa durante varios días, nas zonas urbanas ata que se proceda á súa recollida.

A Consellería de Medio Ambiente lembra que, unha vez recibidas as obras, o concello debe asumir a súa explotación, mantemento e conservación.

As ofertas para a execución destas obras presentaranse no prazo máximo de 26 días naturais contados desde mañá.

Vía: http://certo.posterous.com

Os de sempre xa se adiantaron

venres, 18 de novembro de 2011

Da man á boca pérdese a sopa


Dinos este refrán usado como titulo da entrada, que algo non se ten asegurado ata que non se posúe ou se termina, pois en calquera momento un problema pode botar todo por terra. Polas promesas que nos levan feito para crealo punto limpo de Porto do Son, xa podiamos ter como mínimo un en cada parroquia.

Neste titular de prensa: Tres de cada dez municipios galegos dispoñen dun punto limpo para depositar residuos, publicado o 11 de decembro de 2006, xa se dicía: están en execución os proxectos de A Gudiña, A Peroxa, Becerreá, Guntín, A Guarda e Porto do Son. Nesa data descoñezo onde se ía ubicar, porque a cesión da canteira de Cadeiras, en Nebra, aconteceu case dous anos despois.

O que non me entra na cabeza é que despois de que criticásemos tantos anos dende a organización na que militaba a proliferación de todo tipo de vertedoiros incontrolados, coma este de Quintáns e do que tantas fotos teño subido a Internet, dende a directiva da comunidade de montes dilátanse tanto a convocatoria dunha asemblea extraordinaria, onde os comuneiros e comuneiras puidésemos debater, rexeitar ou ceder «sen precisións», a canteira para poder rematar dunha vez con esta vergoña.


Hai unha semana que o Consello da Xunta aprobou unha partida de case 300.000 euros para a construción do punto limpo de Porto do Son, e onte estivo na zona inspeccionando os terreos a delegada territorial do Goberno autonómico, Belén do Campo.

A representante do Executivo galego recordou a importancia da infraestrutura, que se licitará nos próximos meses, para evitar as verteduras incontroladas de cascallos e lixo, un servizo que ademais dará resposta á demanda dos veciños do termo. O punto limpo levantarase na antiga estrada de Cans e custará uns 296.000 euros que financiará a Xunta.

Doutra banda, Belén do Campo tamén falou da anunciada actuación na AC-550, no tramo entre Porto do Son e Noia, e reiterou o compromiso da Consellería de Medio Ambiente, Territorio e Infraestruturas coa mellora da rede viaria barbancesa.

Fonte: La Voz de Galicia

sábado, 12 de novembro de 2011

Ai, galiñas serán, pero a min cheirar... ¡chéiranme a can!

Tomada o día de San Ramón. Salvo os ramallos, o resto de refugallos seguen aí
Din que o home é o único animal que tropeza dúas veces na mesma pedra, así que como xa levo tropezando demasiado, nesta ocasión e por estar inmersos nunha campaña electoral non vou tirar foguetes ante a enésima promesa da construción do Punto Limpo no noso Concello. A última vez dixen que levabamos máis de dous anos perdidos, pero é que agora xa son 3 e medio... e as palas aínda non entraron a traballar. Isto lévame a pensar coma os amigos de certo: «A Xunta non dá datas de comezo das obras nin finalización, así que pode inserirse este anuncio como parte da campaña electoral do PP»

É certo que precisamos este Punto Limpo como auga de maio, pero tamén é verdade que debemos tomar máis conciencia medioambiental e que non podemos seguir tirando os nosos refugallos en plena natureza, sobre todo os restos de obras que coido que non van ir a dito punto. Aínda que me paraba a denunciar case exclusivamente o vertedeiro da miña aldea, foto de arriba, de vez en cando tomaba instantaneas doutras zonas.

Levo tantas entradas con este tema que pouco mais podo aportar, polo que só me resta rogar que non nos volvan a enganar. Este é outro dos casos nos que podo dicir que os tres partidos con representación no Parlamento de Galicia, xogaron con nós.
Tomada o domingo preto da ponte do Rio Sieira. Leva meses aí
Porto do Son: a Agra de Bustelo acubillará o punto limpo que aprobou hoxe o Consello da Xunta

Case 300.000 euros para as instalacións, casetas, almacén, colectores e sinalización

A Xunta non dá datas de comezo das obras nin finalización, así que pode inserirse este anuncio como parte da campaña electoral do PP

Porto do Son, 10 de novembro de 2011. O Consello da Xunta autorizou hoxe a colaboración técnica financeira entre a Consellería de Medio Ambiente, Territorio e Infraestruturas e o Concello Porto do Son para a construción dun punto limpo neste municipio coruñés. A Xunta de Galicia, a través da Secretaría Xeral de Calidade e Avaliación Ambiental, realizará un investimento de máis de 296.000 euros para o financiamento do 100% desta infraestrutura ambiental.

As obras obxecto da proposta corresponden a aquelas dirixidas á adecuada xestión dos residuos en Galicia, nos concellos que teñen un orzamento insuficiente para financiar estes proxectos. Esta actuación atópase a medio camiño entre Portosín e Porto do Son, na zona chamada Agra de Bustelo, na antiga estrada de Cans, na parroquia de Nebra. O punto limpo é un recinto preparado para que que os cidadáns poidan depositar neles os residuos para os que é precisa unha xestión específica, polo seu tamaño ou pola súa composición. Os obxectivos principais desta instalación son recuperar os materiais contidos nos residuos para a súa reciclaxe, evitar a vertedura incontrolada de entullos e voluminosos e separar os residuos xerados nos fogares que representen un risco para o ambiente. As accións fundamentais centraranse na disposición das instalacións xerais, casetas e almacén, colectores e sinalización. Tamén se executará un peche da canteira, un peche perimetral e unha porta de acceso. O proxecto tamén considera a urbanización e o axardinamento do contorno.

O Goberno galego, mediante a execución desta infraestrutura, responde a demanda dos habitantes de Porto do Son, xa que na actualidade existe un servizo de recollida que non cubre as necesidades dos veciños, cunha periodicidade dun día ao mes. Coa posta en funcionamento deste servizo preténdese concienciar á poboación para tratar de erradicar as verteduras incontroladas e evitar a imaxe dos utensilios na metade da rúa durante varios días, nas zonas urbanas ata que se proceda á súa recollida.

Via: certo

domingo, 30 de maio de 2010

Máis de dous anos perdidos

Parece que a fin dos vergoñentos verquidos incontrolados no noso Concello pode te-los seus días contados, xa que o pleno acepta os terreos de Nebra para o punto limpo. Iso si, a la van dous anos e medio perdidos ou tirados, non se sabe ben por culpa de quen, ou si?.
Menos mal que non se puxo unha cláusula de que se non se facía a obra en dous anos ou se pretendese facer outra cousa, a comunidade recuperaría a concesión. Sendo un pouco malo, foi unha oportunidade perdida para "aproveitarnos" un pouco máis do Concello, que xunto con Xuño somos ás parroquias máis desfavorecidas.

Debullando a noticia quédome con dous apuntes:
- Segundo as explicacións do goberno, o motivo de aceptar eses terreos agora foi que Medio Rural «cada quince días pide un documento novo. Agora ocorréuselle que hai que levar este asunto a pleno».
Foi una mágoa que cando gobernaba o bipartito na Xunta non fixesen o mesmo, neste caso, non-lle fixo falla ningún papel para entrarlle a saco no agro de meu pai.
- Paréceme fenomenal que paralicen a obra de Xuño porque se cuestione a titularidade dun camiño. Pero é unha pena que algúns deses excompañeiros que co seu voto agora aproban esa paralización, calasen e consentisen a cacicada que o seu compañeiro cometeu contra meu pai. Esta visto que para eles hai cidadáns de primeira, segunda ou terceira.
Que conste que me corto un pouco porque foron moitos anos coma compañeiros e amigos, que se non ía máis lonxe, pero non vale a pena, cada un é responsable dos seus actos.

Ceñindome exclusivamente á noticia, vou debullar un pouco polo miúdo que pasou nestes dous anos e medio. A primeira noticia que tivemos os comuneiros de que o Concello estaba interesado en construílo Punto Limpo na antiga canteira, curiosamente non foi por mediación dos representantes da Comunidade como seria o correcto, se non mediante o panfleto Nordés, editado polo BNG de Porto do Son. Nel dixéronse cousas que os comuneiros xamais manifestamos, porque era imposible facelo sen antes coñecelas pretensións do Concello.

Días despois almorzabamos con esta noticia: Tomé acusa ao presidente dos comuneiros de Nebra de dilatar a instalación do punto limpo. Parte de razón tiña, se-lle fixo a petición en xaneiro, o normal por parte do presidente era convoca unha asemblea o mais axiña posible para debater, aprobar ou rexeitala cesión. Para iso están as asembleas extraordinarias.

O certo é que seis meses despois engade o punto na asemblea ordinaria, que están máis para debater outros temas, pero en fin: Cuarto punto.- Petición da alcaldía para autorizarmos un PUNTO LIMPO en Cadeiras.

Do que pasou nesa asemblea dei resumida información nun post do blogue adicado á comunidade baixo o titulo: Que vergoña. Asemblea que contou coa presenza dunha comuneira i edil do actual equipo de goberno.

Non se aprobou nada porque o presidente non tivo ningún interese e menosprezando aos comuneiros, volveu a convocarnos outra vez aos quince días, faltando a verdade na convocatoria e facendo comentarios máis propios de taberna.

Por motivos de traballo non puiden asistir a dita asemblea e non houbo ningunha outra, onde se informase da xuntanza mantida varios comuneiros co alcalde. Teño que supoñer que as cláusulas que se pactaron nesa asemblea, foron as que lle presentaron ao alcalde e que este as aceptou. Non é normal o que pasou, pero é que pasan tantas cousas anormais que unha máis non se nota. O certo é novamente gracias á La Voz de Galicia, soubemos que: Comuneiros de Nebra ceden dous mil metros cadrados para que se habilite o punto limpo.

Por certo, ese mesmo día acompañado do Xefe do IV Distrito de Noia foramos ve-la cacicada que lle fixeran a meu pai, e tampouco tiña constancia da cesión. El tamén se informara de todo isto pola prensa.

Zona onde se vai instalar o punto. Aínda que nas fotos se ve moita pedra, esta desapareceu. Non se sabe se a levaron os comuneiros, únicos autorizados a facelo tal é como se aprobou en asemblea, ou a levaron foráneos, con ou sen autorización.