Pode ser que esta entrada algúns a vexan coma un intento de descualificación á moción de censura que esta semana veñen de presentar o PSOE e BNG contra o actual rexedor Manuel Tomé, pero irían mal encamiñados. Se non a publiquei antes (o esbozo é do día 1) foi porque agardaba elaborar un vídeo aproveitando imaxes do resumo semanal da Barbanza Televisión, recollendo as verbas no pleno dos portavoces do PSOE e do BNG (emitidas nas noticias do luns 2), explicando os motivos polos que se negaban a aprobalo Plan Especial do Castro de Baroña. Lamentablemente dita noticia foi suprimida do resumo, pero non por iso vou de deixar de lado a entrada.
Tanto
El Correo Gallego como
La Voz de Galicia, non recolleron fielmente ditas verbas, non sei a acta, aínda así como estiven presente no pleno, son consciente do que se dixo.
Unha das escusas buscadas para votar en contra, era que así evitaban que os veciños que teñen terreos na zona fosen expropiados. Aínda que o alcalde negou iso, non calou neles.
Para ser políticos, como dixo no pleno a líder do Bloque, descoñecen un pouco os procedementos para ir á
expropiación forzosa. Por certo, aínda que é unha lei franquista, parece que non hai moita presa en derrogala.
Artigo 9.
Para proceder á expropiación forzosa será indispensable a previa declaración de utilidade pública ou interese social do fin a que hai de afectarse o obxecto expropiado.
Non son xurista, mais coido que para que o Concello poida abrir un proceso expropiador ten que contar necesariamente coa aprobación do pleno, aínda que xa digo, podo estar errado.
Porén, todo este procedemento foi vulnerando con premeditación e aleivosía durante o goberno do bipartito na Xunta de Galicia polo PSOE e BNG, nunha propiedade de Pepe do Martelo. O delito cometeuno a Consellería do Medio Rural, avalada por algún directivo da comunidade de montes que
dou orde de cruzarlla con esta pista. Deste feito tivo coñecemento a líder do BNG cando se me chamou a unha reunión en vésperas das eleccións municipais para evitar que as discrepancias existentes entre o presidente da comunidade e o secretario (eu) afectasen á súa campaña. Cando os informei, tanto a ela coma outros militantes escollidos, non todos tiveron acceso a dita reunión, díxome que iso non era para tanto. Esta visto que ela ou eles non foron os afectados.
Visto o visto, parece que para algúns hai veciños de segunda e primeira.
Outro argumento para votar en contra foi porque non daban credibilidade as verbas do alcalde, quen aseguraba ter comprometido un millón de euros de Patrimonio e Turismo para construílo Centro de Interpretación, pero tanto uns coma outros consideraron que iso era unha mera promesa, e carece de validez, ao non estar escrito nun documento.
Agora entendo porque O Son parece que, de momento queda sen polígono e escola infantil: todo foi unha promesa do bipartito, sen nada aprobado en documentos... ou esa foi a conclusión que me levei neste asunto no pleno, quen non?
O peor de todo, na miña opinión, é que con ese voto negativo pecharon a posibilidade de que o Castro de Baroña acade, de momento, a denominación de Ben de Interese Cultural (BIC), que seguirá sen un Centro de Interpretación como ten o Castro de Neixón en Boiro, que seguirá sen uns accesos adaptados a persoas de mobilidade reducida (e iso que a PSOE e BNG, parécenlles poucos os 3 accesos dispostos na rúa Escamas de Portosín), que seguirá o mastodonte imperturbable na Arealonga e por último, seguiremos, os que temos propiedades na contorna, aturando que os "campistas"
fagan o que lles pete nas nosas terras.
Un apunte máis, tirando de hemeroteca, é que
a Xunta do bipartito "prometese" o 31 de agosto do 2007, que xunto ao de Baroña, ía declarar outros 19 castros de Galiza coma Bens de Interese Cultural... outro exemplo de compromiso non levado a práctica?
Para rematar, déixolles un álbum de imaxes do Castro, a contorna e as propiedades colindantes.
